Lumbo lwedi haiwa lwa chasu

KIVOKO 6

1.    Vantu vakanazika he vusho vwa isanga, vakatea vana vakiche

2.    Vana va Murungu, vakavona iti avo vana va kibora va vantu ni vedi, vakaguha vache vovose vevakundie.

3.    Mfumwa Murungu akati, ngoro yangu teikalwane na mntu ambu ye ni nyama; heicho mavuri akwe eneoka igana na makumi meri.

4.    Vanefili navo vekireho he isanga marongo ao, baada ya aho, vana va Murungu vakatonga na vana va vantu, vakatea navo vana. Avo nivo vantu vabaha, vekina ngazo.

5.    Mfumwa akavona iti vivivi vya vantu vyazika kuoka vibaha, na iti kila cho mntu edunganya he ngoro yakwe ni kivivi marongo ose.

6.    Murungu akawaz’wa ni ngoro iti hanini emrumbie mntu, ngoro yakwe ikasoyoyota.

7.    Murungu akati ninemvusha mntu nemrumbie he visho vwa isanga, na nyama na kila che harafa na madeje a he ivunde, ambu nagarusha ngoro yangu iti hanini nevirumbie.

8.    Mira Noa akavona Mhoorere he meso a  Mfumwa.

9.    Ulu nilwo lukolo lwakwe Noa, Noa neki mtu wedi, ena haki he lukolo lwakwe, ne Noa etongie hamwe ne Murungu.

10. Noa akatea vana vatatu: Shemu , Hamu ne Yafeti

11. Isanga likakondika mozya ya mfumwa, likazua dhuluma

12. Murungu akalivona isanga iti lakondika, ambu kila mwenye mwiri, akukondia nzia yakwe mwenye he isanga.

13. Murungu akamwira Noa, mkengelejo wa kila cheho he isanga wazi mozya he mi; kwa kila vazuz’a isanga na dhuluma, ninelikonda isanga hamwe navo.

14. Ukurongie Ibweta la mti wa Mvinje, na uronge vyumba uko ndeni, na uko hanze uijive na Lami

15. Ilo Ibweta ulijenge huu, vvueza vwakwe mikono magana matatu, upana wakwe mikono  makumi masani, na kutonga wanga mikono  makumi matatu.

16. Ilo Ibweta ulirongie kianga, ukengeleje mkono mmwe kukwea na wanga ugere luvwi lwa ilo ibweta he lubavu lwakwe. Uirongie gu ntatu, ya si, yagati na ya wanga.

17. Ambu nineete kifwa cha mpombe he isanga lose, ninekonda kila kintu chena mho cheho si ya isanga vvyose vinefwa.

18. Mira ninevika kiagano change nawe, we unengia he ibweta, we na mche wako na vana vako na vache va vana vako hamwe nawe.

19.  Na kila kintu chena muho vinengia viri viri, nesa tuvihifadhi, chakiche na chakiosi.

20. Na vyose vyepururika sa vuntu vyevyo, na kila aina ya kinyama sa vuntu chevyo, kila cheharafa he isanga savuntu chevyo, vineza hako nesa uvihifadhi.

21. Uvunganye kila aina ya kiz’o cheve kula, uvivunganye vineoka kiz’o chenyu na chavo.

22. Nivwo vuntu Noa erongie, sa vuntu Murungu eremwira, nivwo vuntu erongie

AHA NI UKO NJAGU HAVO MDHIMA FILIPO LUBUA UO EREMUKA AHO 

 AHA NI HE IBUMBA LA NDOLWA 

NIHO HANTU TWEKITASIA UKO KALE 

BIBLIA YEZERIRE KWA CHASU

Kivoko 3:11

 Akamwira “Niani ekwirire iti uhi kituhu?Kana watala he ula mti nekwirire iti usiala?

12: Niho uo mntu akati “Uu mche weninkie akae name eninkie itunda la uo mti nikala”.

13: Niho Mfumwa Murungu akamwira uo mche “ Ni kini iki waronga? Uo mche akati “ Nyoka iniishiže nikala”.

14: Heicho Mfumwa Murungu akaiira nyoka “ kwakila waronga chekee huu, we watufwa kukela nyama žose ža sakeni, kwa ndeni yako unevata, na unela ipusa misi yako yose.

15: Na ninevika vunzo gati yako na uo mche, na gati ya vana vako na vana va uo mche. Ye enekubiga he mtwi, na we unemuuma he kihaga.

16: He uo mche Mfumwa akati: Nineongeža vwasi vwako he kutea vana, kwa vwasi vubaha unetea vana kangi tama yako ineoka he muosi wako, naye enekumukia.

17: He Adamu akamwira, Kwa kila wetereje izii la mche wako ukala itunda la mti nekwirire iti usiela: Isanga lararwa he mburi yako, kwa kula kwako kuneoka kwa vwasi misi yako yose. 

18: Linekuetia visaka na mivwa, na unela mani a thankeni.

19: Unela kižo kwa kiruke cha vusho vwako,  mhaka hantu wenehunduka he ipusa ambu uko niho hantu wefumie. Ambu we uipusa na he ipusa unehunduka .

20: Adamu akamtanga mche wakwe Hawa, kwa kila neye mama wa vose vemogiwe he isanga.

21: Murungu akavachumia Adamu na mche wakwe nkazu ža mkota akavadoka.

22: Niho Murungu akati, “rereha uu mntu aoka sa mmwe wetu emannje chedi na kivivi. Iki nesa asiarongaža mkono wakwe akatunda he mti wa nkalamo akatua kale na kale’-

23: Heicho Murungu akamngasha Adam afume he Bustani ya Edeni aetua aeima he isanga hantu erumbiwe.

24: Heicho akamngasha mntu he io bustani: Akavika mlao upande wa Mashariki wa io bustani akamnka muhandwi weaka eufalaz’a pande z’ose kurinda nzia ye ngiža noko he mti wa nkalamo.

KIVOKO 4

1.      Basi Adam akammanya Hawa mche wakwe, akatea ndeni akammoga Kaini, akati “ Napata mtu he Mfumwa”

2.      Akatea ungi, marongo aa akammogia mduže etangwa Abeli. Basi Abeli ekirisha ng’onji ne Kaini neki muimi.

3.      Basi hantu marongo etongie, ikaoka iti Kaini eete ntogolo ya viz’o vya he mgunda wakwe he Mfumwa.

4.      Abeli naye akaete kimogwa  cha kuvoka cha vinyama vyakwe erisha  na mazunya avyo. Murungu  akazihirwa ntogolo yakwe Abeli.

5.      Mira tezihirwe ntogolo yakwe Kaini. Kanini akavihiwa, vusho vwakwe vukajururuta.

6.      Niho Murungu akamwira Kaini, hanini wevihiwa? Hanini wekoma vusho?

7.      Kaicha wekironga nento, ntogolo yako  teikakundwe? Na wesirongie nento, ibanu likurindie he luvwi, mira kikutala ulivote.

8.      Basi ikaoka iti Kaini ekigaya ne Abeli Mnduže, niho kikaoka iti marongo fulani veho he mgunda, Kaini akamkoma mnduže.

9.      Niho Mfumwa akamwira Kaini “ Mndužo Abeli ehio?” Akati, “Simanya, kwani mi ni mrinji wa mnduu wangu?”

10.  Akawira “ Waronga kintu ani? Izii la sakame ya mndužo liniiia kufuma uko he msau

11.  Heicho we wararwa he isanga lejuvue momo wakwe likahokera sakame ya mndužo kufuma he mkono wako.

12.  Wekiima, isanga telikaekumogia mazao, we uneoka mnntu wa kuthama thama wesina kuhema.

13.  Kaini akati, lute lwangu ni lubahisha sikaludime

14.  Yoo waningasha he vusho vwako, nnefiswa hale na vusho vwako, nneoka muathama esina kuhema he isanga na kineoka iti kila ye enenivona enenikoma.

15.  Murungu akamwira, “heicho mntu enemkoma Kaini, anarihwa kantu mfungate”niho Mfumwa akamgera Kaini kisimbiko nesa kila ye enemvona asiamkoma.

16.  Basi Kaini akavuka mozya he Mfumwa, akatonga kutua he isanga la Nodi leho Mashariki ya Edeni.

17.  Kaini akammanya mche wakwe akatea mwana akamtanga Enoko. Akajenga mzi akauinka izina la mwana wakwe yani Enoko.

18.  Enoko akammoga Iradi, Iradi akammoga  Mehujaeli, ne Mehujaeli akammoga Metusela ne Metusela akammoga Lameki.

19.  Lameki akaovoa vache veri izina la mmwe ni Ada na la wakeri ni Zila.

20.  Ada akammoga Jabali. Ye niye vava wavo vekitue he mahema verisha.

21.  Kaka wakwe ekitangwa Yubali, ye niye vava wavo avo vebiga filimbi na vibubumzinga.

22.  Zila ye akammoga Tubali Kaini ye ni muacheiža wa vashana va viera. Rumburye Tubalkaini ni Nama.

23.  Niho Lameki akavaira vache vakwe: Ada ne Zila terejani kiteto changu, vache vakwe Lameki terejani izii langu. Ambu namkoma mntu kwa kila anigera kivano, mbwange mdori kwakila aniumiza, Kaini enerihiz’wa kantu mfungate, mira Lameki kantu makumi mfungate.

24.  Adam akammanya mche wakwe, akatea mwana ungi, akamtanga Seti  “ambu Murungu aninka mbeu ingi badala yakwe abeli ekomiwe ni Kaini”.

25.  Na he Seti mwana akamogwa, akamtanga Enoshi. Alafu vantu vakavoka kutanga izina la Mfumwa.

KUNU NI VUGWAMA IKI NA AHO NAVONA IPWAKE, IBONDERA, LUFUNDOFUNDO NA MANI ANGI

                                   E MURUNGU VAVA NAHAVACHE KA KIKU